Bolechas de bacallau

A bolecha de bacallau engana a primeira vista. A súa forma lembra á croqueta de sempre, pero en canto se proba queda claro que xoga noutra liga. Non leva bechamel, non leva rebozado e, aínda así, consegue algo que moitas croquetas non logran: sabor limpo, textura melosa e personalidade propia.

É unha receita humilde na aparencia, pero xenerosa no prato. Porque a bolecha é moito máis por moito menos: poucos ingredientes, nada superfluo e un resultado que sorprende desde a primeira dentada. A mestura, tan sinxela como sabia, une a partes iguais a suavidade da pataca e a intensidade do bacallau, dous produtos que semellan terse agardado sempre para atoparse desta maneira.

Cada peza garda ese equilibrio que fai grande a cociña tradicional: a pataca achega cremosidade e dozura; o bacallau, o seu punto salgado e esa profundidade que permanece na boca. Xuntos crean un bocado saboroso, deses que convidan a repetir sen pensalo dúas veces.

O mellor do conto é que non entende de horarios nin de protocolos. Recén feitas, quentes, desprenden todo o seu aroma e conquistan polo seu interior tenro. Pero frías, unhas horas despois, gañan aínda máis presenza e convértense nun petisco perfecto, ideal para acompañar a unhas birras mentras se conversa. 

Ingredientes:

500g de bacallau

500g de patacas

1 pemento morrón

1 cebola

4 dentes de allo

2 ovos

1 folla de loureiro

pementa negra

comiños

perexil

Comezamos facendo o típico rustrido de cebola, pemento e allo.

Ingredientes do rustrido

O rustrido ten que escurrir moi ben, non sendo así, a masa quedará moi líquida

Cocemos o bacallau coa folla de loureiro uns 8 minutos, todo depende do gordo que sexa, se é miga, con 2 ou 3 minutos é máis que suficiente. Xa ti vas vendo! Logo de retirar espiñas e pel, envólvese nun pano de cociña e aprétase, dáselle voltas para retirar o exceso de humidade e ó mesmo tempo esmigallalo como se mostra no seguinte vídeo.

A auga de cocer o bacallao aprovéitase para cocer as patacas (non necesita sal)

Utilízase a mesma cantidade de patacas crudas que de bacallao cocido (neste caso 500g que veñen sendo unhas 50 bolechas aprox.)

As patacas hai que trocealas para acelerar a cocción

Patacas cocidas

Picar un puñado de perexil

Excepto os dous ovos, mezclar todos os ingredientes, incluido pementa, comiños e perexil

Esmagar todo cun escachapatacas ou tenedor

Imaxe de todos os ingredientes agás os ovos

Cando estea todo mesturado, engádese un ovo e mézclase coa man, por si aínda queda algunha espiña. Cando o ovo estea totalmente incorporado, añádese o ovo restante seguindo o mesmo proceso

Imaxe de tódolos ingredientes, pódese observar a tonalidade amarela dos ovos

Cúbrese con film transparente e métese no frigorífico entre dúas horas e un día

No seguinte vídeo mostro a técnica para moldear as bolechas

E entón chega o momento máis agardado: a tixola xa está ao lume con abundante aceite quente, nese punto xusto entre 150 e 170ºC onde a máxia comeza. Pódese ter as bolechas feitas sobre unha empanadeira con papel de forno para que non se peguen, ou ir dándolle forma no momento. Todo depende da práctica e habilidade. 

Unha a unha mergúllanse no aceite e axiña comeza o espetáculo, hai que ir dándolle voltas para que o dourado que vai aparecendo sexa igual por todo, ó chegar ao seu punto, sácanse uns intres a unha bandexa con papel absorbente.

Consideracións a ter en conta:

Se a masa é moi espesa, añade un ovo máis

É preferible que as patacas cocidas non teñan que agardar, hai que mesturalas canto antes co rustrido para que non oxiden

Asegúrate de que o bacallau está no seu punto de sal, se é necesario engade sal

Evita que o rustrido se chamusque

---~---

Pódense comer frías ou quentes!!!

So queda disfrutar

PINCHA AQUÍ PARA VER MÁIS RECEITAS

PINCHA AQUÍ PARA IR Á PORTADA